شعر شعبي عن أيام العز

أيام العز والخير 

وينها ذيج الايام بيها ما جانت تنسد الاجفان
والعراقي من الشمال والوسط حتى الجنوب اخوان
وما جنيت دشوف لا الوالي ولا ناطور طول الليل سهران
ولا تسمع واحد من الشعب يصحَ من النوم وهو حيران
تلكي الجار يسولف وييه جارَ من وارأ الجدران
كلهم حبايب وما يكدر يندس بينهم الشيطان
الاب يرجع من شغلَ ويحضن اولاده وهو فرحان
وزوجته دصيح يا رجل تعال أكول مو أنتَ جوعان

أوفْ ! كضة أيام الخير والعز ومرة كل ذيجَ السنين
وخلقونا بعبوع وسمن’ وسم’ بأسم صدام حسين
شال سيفَ وكام يحارب جنَّ قائد بمعركة حطين
وصار ينقش اسمَ وصورةَ وين ما ليكَ طابوكة من الطين
وهدد شعبَ وكلهم ترى ما أريد أشوفكم متحدين
وللأمريكان كعدوا راحة وألا اضربكم بالهيدروجين
ريسنا الغالي كامْ يعجن الاخضر واليابس بفتْ عجين
يا ربْ ليش اختريتن صدام من بين كل المجانين

كاموا يخوفنا ويكولون جاكم الواوي وجاكم الذيب
وشبعونا حجي مخربط ومليان من دجل واكاذيب
وصرنا نتوسل بالعالم ولكن من يسمع ومن يجيب
وأشقؤنا العرب صرنالهم مثل ذاك الغريب
جروحنا عمقة وأوجاعنا كثرة وما لكينا طبيب
دورنا في الحانات وراءَ ذاكَ الرفيق الحبيب
لكن حذرونا وكالوا لا تشربون ماي الزبيب
لأن الله منعَ واذا ما دصدكون إسألوا الخطيب

جنَّ خايفين من اليوم ئلي بي يحتلنا الاجنبي
ونضحي بارواح الرجال والنساء وحتى الصبي
ويقسم العراق الى طوائف مثل ما هو يابي
ولا يوفي بكل وعودة وحتى ما كام يسمع مطلبي
وخلاني اطيع مثل الأعمَ وتصورني غبي
صدكوني ضيعت المشيتين ومدا أندل دربي مكثرة همومي صرت ما اكدر أعد دكات كلبي 
وينَ اليواسيني ويحميني حتى أرد شبابي

يا ويلي عليك دينار الخير من جنت تكرك بايامك
لا الدولار والجنيه حتي الين جان يوصل لمقامك
والعالم كلها جانت تتوسل بيك وتركع كدامك
لكنك اليوم للأسف خصرت كل احترامك
وكل شدة منك شلون بالملايين كاموا يعدونك
ومن كثرتك ما دا يكيدرون بجيوبهم يشيلونك بأكياس من الورق والنايلون صاروا يحطونك 
وكل هذا لكن جمالك حفضتَ باربع حصونك
يا ريت يجي ذاك اليوم حتى لمقامك يردونك

ونحن ممنونين منكم من حاكم ظالم حررتونا
لكن كم إرهابي سفاح في العراق لميتونا
وحتى من التجاوز وأعتداء الجار ما حميتونا
من سعودية وسوريا وايران جسر بنيتونا
وفي شمال الحبيب شلون صدام جديد خلقتونا
وكل شي ما يعجبكم من الحكومة للمسعود تكوكونا
بالله عليكم مات فوكون ياخَ منا وترحمونا
حتى نكدر نبني عراقنا الجديد ليش ما تخلونا